སྤྱི་ལོ་ ༡༧༡༨ རབ་བྱུང་༡༢ པར་དཔལ་ཆེན་རྡོ་རྗེ་གཞོན་ནུའི་རྣམ་སྤྲུལ་གྲུབ་ཐོབ་རྣམ་རྒྱལ་ལྷུན་གྲུབ་ནི་འབྲུག་སྐྱབས་ཁྲ་རིམ་སྟངས་ཁར་སྐུ་འཁྲུངས། མཚམས་བྲག་དགོན་པར་ རྗེ་ངག་དབང་འབྲུག་པའི་ཞབས་ལས་མཚན་རྣམ་རྒྱལ་ལྷུན་གྲུབ་ཏུ་གསོལ། སྤ་གྲོ་སྟག་ཚང་དུ་ཕུར་པའི་བཅད་རྒྱར་ཞུགས་ནས་ཡི་དམ་དཔལ་ཆེན་རྡོ་རྗེ་གཞོན་ནུས་ཞལ་གཟིགས་གྲུབ་པ་བརྙེས་ཏེ་དཔལ་ཆེན་རྡོ་རྗེ་ཕུར་པའི་གྲུབ་ཐོབ་ཏུ་གྱུར།སྔོན་སྦྱངས་ལས་ཀྱི་འཕྲོ་སད་དེ་བོད་གངས་ཅན་ལྗོངས་སུ་བརྟོལ་བོད༌དུ༌རོ་ལངས་དམ་ལ་བཏགས་པའི་འབུལ་མཚོན་དུ་བྱིན་ཅན་གྱི་ཐང་ཀ་གསུམ་ཕུལ་ཡོད་པ་ནི་ད་ལྟ་པད་ཚལ་གླིང་དགོན་པའི་ནང་རྟེན་དུ་བཞུགས་བཞིན་ཡོད། དེ་བཞིན་འབྲུག་གཞོང་དཀར་རྫོང་གི་བདུད་སྡེ༌མ་ལུས་པར་བཏུལ་བའི་མཛད་པ་བསྐྱངས་པས་མཚན་སྙན་གྲགས་གང་སར་ཁྱབ་སྟེ་ཡུལ་མི་རྣམས་ཀྱི་སྤྱི་བོའི་རྒྱན་དུ་གྱུར། མཉེས་པ་གསུམ་གྱིས་བླ་མའི་ཅི་གསུང་བཀའ་བཞིན་བསྒྲུབ་པར་མཁས་བླངས་གནང་ཞིང་ ཞོང་དཀར་རྫོང་གི་སྣེ་ཁྲིད་དེ་ ཕུར་པའི་ཨེ་ཁྲམ་ཆ་ཚང་བ་བླ་མའི་ཞལ་བཀོད་བཞིན་བླུགས་བཟོ་སྤྲོས་བཟོ་མཁས་པ་རྣམས་ཀྱིས་ལེགས་པར་བསྒྲུབས་ཏེ་ཕུལ་ཡོད་པ་ནི་ ད་ལྟ་དགོན་པའི་ནང་བརྟེན་རྩ་ཅན་དད་མོས་ཅན་ཞིག་ཏུ་འགྱུར། གྲུབ་ཐོབ་ཆེན་པོ་ལྷ་ས་ཇོ་བོའི་སྐུ་མདུན་དུ་བཟང་སྤྱོད་འབུམ་ཐེར་གསོག་བཞིན་པའི་སྐབས།ཇོ་བོས་གསུངས་བྱོན་ཏེ་གདུལ་བྱ་དང་གདན་ས་ལྷོ་མོན་དུ་ཡིན་པར་ལུང་བསྟན་བསྩལ། གྲུབ་ཐོབ་ཉིད་ལྷ་ས་ནས་འབྲུག་ཡུལ་དུ་འབྱོན་ལམ་ཁར་ ངན་ལམ་རྒྱལ་བ་མཆོག་དབྱངས་དང་ ཤུད་བུ་དཔལ་སེང་ཟུང་གི་རྣམ་འཕྲུལ་གཏེར་ཆེན་ཨྱོན་དྲི་མེད་གླིང་པ་དང་མཇལ་ནས་གུ་རུའི་ལུང་བསྟན་ལྟར་ཆོས་བདག་ཏུ་གཟིགས་ཏེ་ཐུགས་སྒྲུབ་ཡོན་ཏན་ཀུན་བྱུང་། ཚེ་སྒྲུབ་རྡོ་རྗེ་སྲོག་སྒྲུབ། འཁོར་བ་འཇིགས་སྒྲོལ་སོགས་དབང་ལུང་ཁྲིད་གསུམ་མ་ལུས་པར་གསན། དྲི་མེད་གླིང་པས།  

དེ་ནས་རང་གི་སློབ་མ་ཁྱད་པར་ཅན། །འབྲུག་པ་དགེ་བཤེས་རྣམ་རྒྱལ་ལྷུན་གྲུབ་དེ། །

རང་ཡུལ་བགྲོད་ཉེར་གུར་དང་བསླབ་བྱ་ཞུས། །བདག་གིས་སྤྲོ་དགའི་ཀློང་ནས་འདི་འབུལ་ལོ། །ཞེས་ཀྱང་གསུངས་སོ།།

གོང་མས་ལུང་བསྟན་ལྟར་འབྲུག་ཡུལ་དུ་གནོད་བྱེད་ཀྱི་དགྲ་བགེགས་རྣམས་མ་ལུས་པར་དམ་ལ་བཏགས་ནས་བསྟན་པ་དང་འགྲོའི་དོན་དུ་འགྲོ་དོན་རྒྱ་ཆེར་མཛད་པའི་མཐར་རེ་ཞིག་གཟུགས་སྐུ་མཚན་དཔེའི་མེ་ཏོག་ཆོས་དབྱིངས་སུ་ཟུམ་པའི་ཚུལ་བསྟན་ཏོ།།